श्री बजरंग बाण

दोहा

निश्चय प्रेम प्रतीति ते , विनय करें  सनमान | 

तेहि के कारज सकल शुभ , सिद्ध करें हनुमान | | 

जय हनुमन्त संत  हितकारी  |

सुनी लीजै प्रभु अरज हमारी | |  

जन के काज विलम्ब न कीजै  |

आतुर दौरि महा सुख दीजै | |

जैसे कूदी सिन्धु महिपारा | 

सुरसा बदन पैठी विस्तारा | | 

आगे जाए लंकिनी रोका |

मारेहु लात गई सुरलोका | | 

जाय विभीषन को सुख दीन्हा |

 सीता निरखि परमपद लीन्हा | |

बाग उजारि सिन्धु महं बोरा |

 अति आतुर जम कातर तोरा | |

 अक्षय कुमार को मारी संहारा |

 लूम लपेटी लंक को जारा | |

 लाह समान लंक जरि गई |

 जय जय धुनी सुर पुर महं भई | |

 अब विलम्ब केहि कारन स्वामी |

 कृपा करहु उर अन्तर्यामी | |

 जय जय लखन प्राण के दाता |

 आतुर होई दुख करहुं निपाता | |

जै गिरिधर जै जै सुख सागर |

सुर समूह समरथ भटनागर | |

ॐ हनु हनु हनुमंत हठीले |

बैरिहि मारू बज्र की कीले | |

गदा बज्र लै बैरिहिं मारो |

महाराज प्रभु दास उबारो | |

ॐ कार हुंकार महाप्रभु धावो |

बज्र गदा हनु विलम्ब न लावो | |

ॐ ह्रीं ह्रीं ह्रीं हनुमंत कपीसा |

ॐ  हुं  हुं  हुं  हनु अरि उर शीशा | |

सत्य होहु हरी शपथ पायके |

रामदूत धरु मारू जाय के | |

जय जय जय हनुमंत अगाधा |

दुख पावत जन केहि अपराधा | |

पूजा जप तप नेम अचारा |

नहिं जानत हौं दास तुम्हारा | |

वन उपवन मग गिरि गृह माहीं |

तुम्हरे बल हम डरपत नाहीं | |

पाय परौं कर जोरि मनावौं |

येही अवसर अब केहि गोहरावौं | |

जय अंजनी कुमार बलवंता |

शंकर सुवन वीर हनुमंता | |

बदन कराल काल कुल घालक |

राम सहाय सदा प्रति पालक | |

भूत , प्रेत , पिशाच निशाचर |

अग्नि बैताल काल मारी मर | |

इन्हें मारू , तोहि शपथ राम की |

राखउ नाथ मरजाद नाम की | |

जनक सुता हरि दास कहावो |

ताकी शपथ विलम्ब ना लावो | |

जय जय जय धुनि होत अकासा |

सुमिरत होत दुसह दुख नाशा | |

चरण शरण कर जोरि मनावौं |

येहि अवसर अब केहि गोहरावौं | |

उठु उठु  चलु तोहि राम दुहाई |

पांय परौं कर जोरि मनाई | |

ॐ  चं चं चं चपल चलंता |

ॐ  हनु  हनु  हनु  हनु  हनुमंता | |

ॐ  हं  हं  हांक देत कपि चंचल |

ॐ  सं  सं  सहमि पराने खल दल | |

अपने जन को तुरत उबारो |

सुमिरत होय आनन्द हमारो | |

यह बजरंग बाण जेहि मारै |

ताहि कहो फिर कौन उबारै | |

पाठ करै बजरंग बाण की |

हनुमत रक्षा करै प्राण की | |

यह बजरंग बाण जो जापै |

ताते भूत प्रेत सब कांपै | |

धूप देय अरु जपै हमेशा |

ताके तन नहिं रहै कलेशा | |

दोहा

प्रेम प्रतीतिहि कपि भजै , सदा धरै उर ध्यान |
तेहि के कारज सकल शुभ, सिद्ध करैं हनुमान | |